Leioako Udalak iragarri du elkarteak urriaren 30ean jasoko duela aitortza, udalerriaren 500. urteurrena ospatzeko ekitaldien barruan.
GAUDE elkarteak 2026ko Leioako Eguna saria jasoko du. Leioako Udalak urtero ematen duen sari honek elkartearen ibilbidea eta jarduera nabarmentzen ditu aurten, eta, bereziki, herriko bizitzan duen inplikazioa.
Albistea ostegun honetan, urriaren 15ean, eman dute jakitera, Leioak urriaren 30ean eta 31n 500. urteurrena ospatzeko antolatu duen jarduera egitarauaren aurkezpenean.
Saria urriaren 30ean, ostirala, 20:00etan, Artatza jauregian emango dute, Leioako Egunaren ospakizunean. Ekitaldian, udalerriko elkarteei omenaldia ere egingo zaie, eta herriko gizarte eta komunitate bizitzari egiten dioten ekarpena aitortuko da.
45 urte Leioako bizitzaren parte izaten
Aitortza hau GAUDErentzat bereziki esanguratsua den urte batean iritsi da. Elkartea 1981ean sortu zen, eta 2026an 45 urte bete ditu Bizkaian adimen-desgaitasuna duten pertsonei eta haien familiei laguntza eskaintzen.
GAUDEren eta Leioaren arteko harremana elkartearen hastapenetara doa. Izan ere, Sarriena auzoko Donibanen hasi zuen bere jarduera, zentro okupazional batekin eta eguneko zentro batekin.
Gaur egun, Leioa da GAUDEk zerbitzu eta laguntza mota gehien eskaintzen duen udalerria. Bertan daude Donibane Zentro Okupazionala, Monte Ikea Eguneko Zentroa eta tutoretzapeko etxebizitza bat. Azken horretan, adimen-desgaitasuna duten zortzi pertsona bizi dira.
Elkartearen bulego nagusia ere Leioan dago. Bertatik, familiei laguntza eskaintzen diegu, eta aisialdi eta kirol zerbitzuak koordinatzen ditugu, baita prestakuntzarekin eta enplegu bilaketarekin lotutako ekimenak ere.
Horrez gain, udalerrian dugun presentziak tokiko enplegua eta adimen-desgaitasuna duten pertsonentzako aukera okupazionalak sortzen laguntzen du.
Komunitatean dugun parte-hartzearen aitortza
Leioako Eguna sariak, bereziki, GAUDEk herriko bizitzan duen inplikazioa aitortzen du, eta elkarteek komunitate aktibo eta parte-hartzailea eraikitzeko duten zeregina nabarmentzen du.
GAUDErentzat, aitortza honek esanahi berezia du, elkartearen 45. urteurrenarekin bat datorrelako. Aukera berezia da elkartea osatzen duten eta haren ibilbidean lagundu duten pertsona guztien ekarpena balioesteko.
Aitortza honek etorkizunera begiratzera ere bultzatzen gaitu, eta gogorarazten digu pertsona guztiek parte hartu eta beren eskubideak baliatu ahal izango dituzten komunitatea eraikitzea guztion ardura dela.
- urteurreneko ospakizunek urriaren 31n, larunbata, jarraituko dute, herritar guztiei irekitako jarduerez osatutako egun batekin. Bertan, Leioak bere historia partekatuko du, eta herria osatzen duten pertsonen eta kolektiboen zeregina ospatuko du.
Leioaren 500 urteko historia eta GAUDEren 45 urteko ibilbidea. Bi urteurren, biak ere parte garen komunitatearen ospakizun berean elkartuta.
Komunitatean GAUDE. Komunitatea gara.
