Uribe Kosta Elkartea adimen urritasuna zuten pertsona batzuen gurasoen talde txiki baten ahaleginari esker sortu zen, 1976an Bizkaiko Uribe Kosta eskualdea talde horri arreta egokia emateko zerbitzuz hornitzea izan baitzuen helburu. Senitartekoen talde txiki hori "familien elkarte" gisa eratu zen 1981ean, adimen urritasuna zuten pertsonen aldekoa, eta hori izan zen egungo elkartearen jatorria.

Irabazteko asmorik gabeko erakundea da, eta pertsonak eta familiek, bazkideek, erabiltzaileek, langileek, boluntarioek eta Elkartearen lagunek eratzen dugu. Espezialistak gara laguntza ematen, bai Bizkaiko Lurralde Historikoan adimen urritasuna duten pertsonei, bai haien senitartekoei ere.

2017ko urriaren 2an, agur esan diogu “Uribe Kosta Elkartea” izenari eta “GAUDE” izena hartu dugu.

Aldaketa horrekin batera, etapa berri bat hasiko da, ilusio, erronka eta proiektu berriz betea. Baina, oroz gain, berritu egin dugu aukerak eta laguntzak sortzeko konpromisoa, gure misioarekin bat etorriz, pertsona eta familia guztiok bizitza osoa izan dezagun.

GAUDE izena aukeratu dugu, ezagun izan nahi dugulako gure presentziagatik eta eskubide osoko herritar bezala gizarteratzeagatik. Hemen GAUDE hesiak gainditzen ari garelako, herritar oso izateko eskubidea defendatzen eta aldarrikatzen dugulako eta aukerak sortzen ditugulako zentzua duten bizitzak bizitzeko, funtsean, bizi-proiektuei laguntzen diegulako.